Poslovne vijesti - Makedonija

Kомерцијална банка прва воведе електронска банкарска гаранција

Kомерцијална банка е прва од банките во Македонија која се приклучи кон проектот за одобрување на гаранциите за лицитација во електронска форма и завчера почна со издавање на овој вид гаранции.

Од банката објаснуваат дека целокупниот процес се одвива електронски, по пат на е-пошта, во која како прилог се доставуваат гаранциите, барањата за активирање како и известувањата за ослободување, дигитално потпишани.

Kлучна придобивка од овој сервис е модернизацијата и поедноставувањето на постапките за издавање на гаранциите за учество на тендер од страна на Банката и воедно заштеда на трошоците и времето за издавање на гаранциите, а за компаниите - клиенти на банката им се нуди едноставна можност и погодност да добијат уште една услуга во електронска форма, со зголемена сигурност за набавувачите во поглед на доверливоста, а од друга страна на истите тие клиенти кои се понудувачи на одреден тендер им се олеснува начинот на поднесување на понудата.

Проектот „Издавање банкарска гаранција во електронска форма“ е новина која се воведува во работењето на деловните банки во Македонија, поддржан од страна на УСАИД, е-влада при Министерството за информатичко општество и администрација и Бирото за јавни набавки при Министерството за финансии.

Единствен исклучок од ваквиот начин на поднесување на понудата претставува банкарската гаранција, која до овој момент исклучиво се поднесуваше на хартија.